5. fl. karla Deildarbikarmeistarar
Undanfarnar tvær helgar hafa strákarnir í 5. flokki tekið þátt í Deildarbikarkeppninni í handbolta og staðið sig aldeilis frábærlega. FH sendi alls 5 lið til keppni, tvö á yngra ári og þrjú á eldra.
Yngra liðið lék í Hafnarfirði um þar síðustu helgi. FH-1 gerði sér lítið fyrir og sigraði í öllum sínum leikjum og varð Deildarbikarmeistari. Þeir höfðu nokkra yfirburði í mótinu og unnu m.a. Stjörnuna í úrslitaleik, 18-9.
FH-2 áttu einnig aldeilis frábært mót því mótið var þannig uppsett að öllum liðum var blandað saman, þ.e. ekki var skipt í riðla eftir getu. Þeir léku því við sum af betri liðum mótsins en létu það ekki á sig fá. Þeir áttu frábæra leiki og gerðu m.a. jafntefli við Fram sem lék til úrslita við FH-1 og aðeins vantaði herslumun á að þeir kæmust í milliriðla.
Eldra árið lék nú um nýliðna helgi og er skemst frá því að segja að þeir stóðu sig frábærlega. Þau komust öll í milliriðla og FH-1 sigraði mótið eftir að hafa haft nokkra yfirburði í riðlakeppninni. Sigruðu svo Fram og gerðu jafntefli við Selfoss í úrslitum sem dugði þeim til sigurs. FH-2 og FH-3 áttu einnig frábært mót, oft á tíðum á móti A-liðum andstæðinganna. FH-3 vann til dæmis A-lið Vals og FH-2 vann A-lið Hauka. Í þessum liðum eru meira að segja nokkrir strákar af yngra ári sem þó var ekki hægt að sjá á leik þeirra.
Aldeilis frábær árangur hjá strákunum og ljóst að FH þarf ekki að kvíða framtíðinni. Þarna eru á ferðinni stórir árgangar af afar efnilegum handboltamönnum sem örugglega eiga eftir að sjást í meistaraflokknum eftir nokkur ár. Þessir strákar hafa alla tíð verið einstaklega duglegir við æfingar, hafa mikinn metnað og tilbúnir að leggja mikið á sig. Enda lætur árangurinn ekki á sér standa.
Það verður virkilega gaman að fylgjast með þessum strákum á næstu árum og við hjá fh.is hvetjum fólk til að kíkja á þessa stráka í næstu keppnum.
Það má svo gjarnan geta þess hér að FH mun heiðra þessa frábæru fulltrúa sína á heimaleik meistaraflokks karla við Akureyri á morgun, fimmtudag.
Glæsilegt strákar og til hamingju með þennan frábæra árangur.
