Stelpurnar í efstu deild að ári!
Í dag fór fram síðari leikur FH og ÍBV í úrslitakeppni 1. deildar kvenna í eyjum. Fyrri leiknum lauk með 0-0 jafntefli í Krikanum og síðari leiknum lauk einnig með jafntefli 2-2. En útivallamörk FH fleyta þeim áfram í úrslitaleikinn og um leið í efstu deild að ári.
FH byrjaði illa og fyrirliðinn Berglind “Bella” Arnardóttir varð fyrir því óláni að skora í eigið mark. ÍBV bætti svo við öðru marki og staðan orðin slæm fyrir FH-inga. En í síðari háfleik var stríðsgæfan með okkar stelpum og þær náðu að jafna leikinn áður en yfir lauk. Fyrst var það Grundfirðingurinn knái Jóhanna Steinþóra Gústafsdóttir eftir hornspyrnu og klafs í teignum og hið síðara skoraði hin unga Elísbet Guðmundsdóttir með glæsilegu skoti á 92. mínútu.
S.s. úrslitaleikur framundan gegn Haukum á sunnudag kl. 14:00 og sæti í efstu deild í höfn.
Til hamingju stelpur, Jón, Arna, Bidda og félagar.