Viðtal við Elvar Guðmundsson
Jæja Elvar, þá er komið að útileik gegn Selfossi. Hvernig leggst leikurinn í mannskapinn?
“Leikurinn leggst vel í okkur, eins og allir leikir. Þurfum að koma sterkir til baka eftir tap í síðasta leik og tryggja okkur 2 stig, annars verður framhaldið mjög erfitt fyrir okkur.”
Verður lagt upp með eitthvað sérstakt í leiknum?
“Nei, ekkert sem ég hef heyrt af. Held við verðum bara að einblína á að spila okkar leik, þ.e. að halda “konceptinu” frá síðustu leikjum, að spila agaðan og yfirvegaðan sóknarleik og grimman varnarleik þá sækjum við stigin sem verða í boði.”
Nú eigum við FH-ingar nokkra unga og efnilega markmenn sem eru á þröskuldinum við að spila í meistaraflokki, en almennt er umræðan á Íslandi sú að það skorti töluvert upp á þjálfun ungra markmanna. Hvernig má bæta þetta og hver var þín reynsla af þessum málum þegar þú varst að spila í Danmörku?
“Það er rétt, mér líst vel á þá markmenn sem eru að koma upp úr yngri flokkunum hjá FH. En það má gera miklu betur í því að þjálfa markmenn og gera það starf markvissara. T.d hafa fastan hálftíma til klukkutíma á viku þar sem markmenn fara í gegnum séræfingar undir leiðsögn þjálfara eða leikmanns sem hefur reynslu af því að spila sjálfur í markinu. Hjá sumum liðum í Danmörku er sér markmannsþjálfari sem sér alfarið um og ber ábyrgð á markmannsþjálfun. Eitthvað róttækt þarf allavega að gera því við erum töluvert á eftir þessum betri þjóðum hvað varðar markvörslu.”
Þrátt fyrir breytt mótafyrirkomulag hefur enn vantað svolítið upp varðandi aðsókn á leiki og áhuga almennt á handboltanum. Hvað er til ráða hér á landi til þess að rífa boltann upp á ný?
“Fyrir það fyrsta þarf að taka af skarið og byrja að sýna beint frá þýska handboltanum í sjónvarpinu. Eins má gera meira úr boltanum í íslensku sjónvarpi með vikulegum þáttum, og þá á ég við betri þætti en Handboltakvöld á RÚV. T.d. “Boltinn með Steina Arndal” eða e-ð í þeim dúr. Einnig mætti setja fasta leikdaga á þetta, t.d á föstudögum með einum sjónvarpsleik á laugardegi og svo kæmi þátturinn á mánudegi sem myndi kryfja umferðina með viðtölum við dómara og þess háttar. Eins mætti gera umgjörðina skemmtilegri fyrir áhorfendur í húsunum, t.d með öflugri veitingasölu, dansandi klappstýrum og fleira í þeim dúr.”
Að lokum Elvar, hverjir taka HM í sumar!?
“Argentína”
FH – Selfoss, föstudaginn 17. mars kl. 20.00 á Selfossi.
Áfram FH!